الحلقة رقم 21 من مسلسل اللعبة 3

Admin العمر : 35

الحلقة رقم 21 من مسلسل اللعبة 3 5b9e772c2b

(يحاول مصطفى ايقاظ عين وسلمى تجلس مصدومة بقربه على الارض)
(مصطفى)
_ عين ... عين اصحي انتي سامعاني؟ ... سلمى ساعديني شوية عشان نفوئها.
(سلمى)
_ افوئها ازاي .. وهقلها ايه؟ .. احنا اتضحك علينا.
(مصطفى)
_ هو ده وقته يا سلمى؟ .. لازم نفوق عين ونرجعها البيت.
(سلمى)
_ والعربية؟ .. هنسيبها هنا؟
(مصطفى)
_ اه .. مش هنعرف نطلع من هنا.
(سلمى)
_ ليه؟
(مصطفى)
_ عشان .. مش هنعرف يعني .. هنروح من هنا ليه ماحنا خلاص عرفنا مين الي بيهددنا .. نوسي اضعف من انها تقدر علينا كلنا ... و روميو محبوس عندنا بالبيت .. نعرف شروق فين وبعدين نمشي من هنا كلنا ... يلا بئى حاولي معايا نصحيها.
(سلمى)
_ مصطفى ... نوسي مش ضعيفة .. دي قدرت تعمل بلاوي لحد دلوقت .. اكيد هترجع تبوظ العربية عشان تحبسنا هنا.
(مصطفى)
_ لا مش هتعمل كده .. لانها بالنهاية اكيد مش عايزة تموت في المكان ده .. فكري فيها شوي هتلاقي ان العربية دي هي الوسيلة الوحيدة الي تخرجها من هنا.
(سلمى)
_ وافرض انها مش عايزة تخرج من المكان ده يا مصطفى؟ ... باين انها عايزة تموتنا كلنا واحد واحد عشان تفضل انت ليها لوحدها .
(مصطفى)
_ ايه؟ انتي بتخرفي ايه لا طبعا .. نوسي مش بتفكر بكده خالص.
(سلمى)
_ ازاي مش بتفكر؟ ... دي قدامي مسكت فيك و ..
(مصطفى)
_ سلمى .. كفاية .. مش عايز حد يعرف ب الي حصل ده.
(سلمى)
_ ومش عايز ليه بئى؟ وانت ازاي اساسا وافقت كده؟؟ ... انت كان لازم تبعد عنها وترفض.
(مصطفى)
_ انتي ما كنتيش واخده بالك انها كانت حاطة المسدس على صدري؟ ... ده انا كنت خايف اتنفس تطلع منه رصاصة ...
(سلمى)
_ وحتى لو كده ... المفروض يكون الموت عندك اهون من انها تقدر تبوسك.
(مصطفى)
_ انتي اتجننتي يا سلمى؟؟؟ ... انتي شايفة اساسا ان ده وقت افكر فيه ب الي حصل؟ ... عين لسى على الارض ومش عارف افوئها لحد دلوقت ... وبعدين يعني ايه الموت عليا اهون؟؟؟
(سلمى)
_ اه طبعا .. عشان نوسي حلوة بئى عادي.
(مصطفى)
_ عادي؟؟؟؟ .... انا قلت انه عادي؟؟؟؟؟؟ انتي عايزة تجلطيني؟
(سلمى)
_ يكون في علمك يا مصطفى .. لو كانت نوسي حبستنا هنا وهددتنا وخطفت شروق عشان تاخدك فده لايمكن يحصل ابدا .. لو كده انا اعمل اكتر منها واخدك ... على جثتي لو قدرت تاخدك.
(يقف مصطفى مذهولا ويقول)
_ يا نهار اسود ... انتي ازاي تتجرئي تقولي كده؟؟؟؟
(سلمى)
_ طبعا .. انا ما تجرئش انما نوسي عشان معاها مسدس وشعرها طويل وحلوة بئت هي عادي.
(مصطفى)
_ قومي ... قومي يابنت .. انتي اتجننتي خلاص ... يلا قومي مش عايزك تفوئي عين انا هصحيها لوحدي يلا قومي.
(تقف سلمى قائلة)
_ لعلمك .. لما عين تفوق انا هقلها على كل حاجة يا مصطفى .. والي حصل قدامي ده مش هيعدي بالساهل.
(مصطفى)
_ مجنونة .. والله انتي مجنونة .. ده بدل ما تفكري ب عين المرمية على الارض ولا حتى بنوسي الي طلعت عايشة؟
(سلمى)
_ وافكر بيها ليه ماهي خلاص طلعت عايشة ... انا عارفة ازاي ضحكت علينا كلنا وافتكرناها ماتت .. فوئ عين الدنيا ليل لازم نرجع البيت.
(مصطفى)
_ جيتي التايهة يعني مانا بئالي ساعة بقول عايز اصحيها.

الحلقة رقم 21 من مسلسل اللعبة 3 Ca229668ba

(في المنزل ... حيث يصل حماده ومحمد فرج سوية للمنزل ويدخلون فيجدون سيد ممدوح ومحمد كرويم في الصالة ومعهم سيليا وسيد يقف متوترا )
(سيد ممدوح)
_ كنتو فين لحد دلوقت؟
(حماده)
_ كنا بنتمشى برا البيت.
(محمد كرويم)
_ مع بعض؟
(محمد فرج)
_ لأ ... انا قابلت حماده على الباب ودخلنا مع بعض .. انا كنت محتاج اتمشى شوية وقلت اني مش هبعد.
(سيد ممدوح)
_ بس انا قلقت عليكم .. ياريت اي حد يحب يخرح من البيت ما يطلعش لوحده .. وبعدين مصطفى والبنات فين؟ هم لسى بيتمشو برا؟؟
(حماده)
_ بيتمشو برا؟؟ ... انا ماشفتش حد منهم .. اساسا الدنيا بئت برد اوي.
(سيليا)
_ ما تخافش يا سيد اكيد شوي وهيدخلو .. هم بس يحلو الخلاف الي بينهم.
(سيد ممدوح)
_ ايه الخلاف الي ياخد كل الوقت ده؟؟ انا ابتديت اتوتر بجد.
(حماده)
_ هم لسى بيتخانئو؟ .. ايه مشكلة البنات دول؟ هم مش واخدين بالهم من الوضع الي احنا فيه؟
(محمد فرج)
_ خنائ ايه ده؟
(حماده)
_ ماتاخدش ببالك كلام فارغ .. انا هنزل تحت اخد دور علي بالحراسة .. زمانه دلوقت حقد عليا اوي.
(ينزل حماده باتجاه القبو ويجلس محمد فرج قائلا)
_ شيكا بئى كويس يا جماعة؟
(سيد ممدوح يجلس قائلا)
_ شيكا تعبان .. لازم نأمنله الراحه وهيكون كويس.

(على باب المنزل .. حيث يصل مصطفى وسلمى ومعهم عين)
(مصطفى)
_ حاسة ب ايه دلوقت يا عين؟
(عين الحياة)
_ انا كويسة ... هو صداع بس ماتخافوش.
(سلمى)
_ احنا وصلنا خلاص .. دلوقت تدخلي وترتاحي.
(يفتح مصطفى الباب ويدخلون المنزل .. تقف سيليا متوترة لتعرف ماذا جرى فيقول سيد)
_ ها اخيرا رجعتو؟
(محمد كرويم)
_ كل الوقت ده بتحل المشكلة الي بينهم يا مصطفى؟ هي الخنائة بينهم كبيرة للدرجادي؟
(عين الحياة تجلس على احدا الكراسي لترتاح قائلة)
_ خنائة؟ هو مين اتخانئ مع مين؟
(سيليا باترتباك)
_ اصل سيد سئلني يا عين انتو كنتو فين ... انا كنت مضطرة اقوله على الخنائة الي حصلت بينكم.
(سلمى)
_ خنائة؟... دي كلمة صغيرة ع الي ممكن اعمله.
(سيد ممدوح)
_ للدرجادي؟ ... باين ان المشكلة بينكم بئت كبيرة اوي.
(يجلس مصطفى قائلا)
_ يا جماعة احنا عندنا اخبار ليكم .. هتتفاجئو عشان كده مش عايز اقولها مرة وحدة ... انا همهدلكم بالاول لان ال ...
(سلمى مقاطعة مصطفى)
_ نوسي طلعت عايشه.
(يقف الجميع ومصطفى ينظر لسلمى بغضب قائلا لها)
_ انتي بتعملي كده ليه؟
(سلمى)
_ مافيش داعي للمقدمات مش هيتفاجئو على قد مانا اتفاجئت ب الي شفته قدام عنيا.
(سيد ممدوح)
_ نوسي عايشة؟ ... انتو متأكدين؟؟؟؟ ... يعني شفتوها بعنيكم؟؟؟
(سلمى)
_ شفناها اه ... ياريتها جت على الشوف وبس.
(سيليا تفرح قائلة)
_ معقولة؟؟ ... نوسي عايشة بجد؟ ... طب ازاي انتو مش قلتو انكم شفتو الجثة متعلقة؟
(محمد فرج)
_ طالما عايشة هي فين؟؟؟
(محمد كرويم)
_ ماجتش معاكم ليه؟؟
(سلمى)
_ يا جماعة ما تفرحوش اوي كده .. نوسي هي الي حابسانا كلنا هنا .. يعني نوسي هي شريكة روميو.
(حماده يأتي من القبو وقبل ان يدخل الصالة يسمع كلام سلمى فيستغرب قائلا)
_ ايه؟؟؟ ... نوسي؟؟ ... هي مش نوسي ماتت؟
(سيد ممدوح)
_ يعني نوسي مثلت علينا انها وقعت من مرتفع عالي عشان تلعب علينا اللعبة دي؟؟؟
(محمد فرج)
_ يا جماعة المهم انها عايشة والحمدلله ... انما حكاية الشراكة دي مع روميو ما تاخدوش في بالكم اوي تلاقي نص الموجودين هنا مضحوك عليهم منه ومشاركينه كمان.
(محمد كرويم)
_ طيب فهمونا ليه ما جبتوهاش معاكم؟؟؟ كنا فهمنا منها بالضبط عملت كده ليه؟
(عين الحياة)
_ دي ضربتي على دماغي لحد ما اغمي عليا .. وكمان رفعت سلاح على مصطفى وسلمى.
(سيد ممدوح)
_ للدرجادي؟؟ سلاح؟ ليه طيب؟
(سلمى)
_ عايز تعرف رفعت سلاحها على مصطفى ليه ولا هي اساسا معاها السلاح ده من اصله ليه؟؟ صدقني في الحالتين الاجابة مش هتعجبك.
(مصطفى)
_ كفاية بئى يا سلمى اعقلي.
(محمد كرويم)
_ انا هدخل اقول لشيكا.
(سيليا)
_ وانا كمان هطلع اقول ل سالي ... الحمدلله على الاقل طلعت لسى عايشة.
(سيد ممدوح)
_ حماده انت مش قلت انك نازل تاخد مكان علي؟؟ جيبه خليه يعرف هو كمان ايه الي بيحصل .. باين لما نجتمع كلنا عشان نعرف هنعمل ايه.
(حماده)
_ مانا كنت جاي عشان اقلكم الي حصل ... اصل ... روميو ضرب علي وهرب .. والمسكين لسى تحت مغمى عليه.

(في القبو)
(سيد ممدوح)
_ تعالو نطلع علي لفوق يا جماعة.
(مصطفى بغضب)
_ انا مش فاهم قدر يهرب ازاي؟؟؟
(محمد فرج)
_ اكيد نوسي هي الي ضربت علي وفكت روميو وهربته .. انتو مش بتقولو انها هي شريكته؟
(مصطفى)
_ مش ممكن يكون ده بيحصل بجد ... بعد ما كنا امسكناه خلاص .. دلوقت رجعنا لنقطة الصفر لا هنعرف نرجع شروق ولا هنخلص من روميو ابدا.
(حماده)
_ يا جماعة نطلع علي الاول بعدين نتكلم.

(في الصالة حيث شيكا وسالي موجودين ايضا)
(مصطفى)
_ لازم نعرف مين الي كان برى البيت او لوحده .. لان واحد مننا هو الي هرب روميو.
(شيكا)
_ واحد مننا ازاي يا مصطفى؟ ... هي مش نوسي شريكته؟
(مصطفى)
_ نوسي مش هي الي عملت كده لا يمكن.
(سلمى)
_ لا يمكن ليه؟ .. انت بتدافع عنها ليه اساسا؟ ولا يعني بئيت بتحبها خلاص بعد الي حصل؟
(عين الحياة)
_ هو ايه الي حصل؟
(سلمى)
_ اسئلي الباشا ... الفنان الكبير .. المثل الاعلى .. الانسان المحترم الي كلنا بنحبه وبنحترمه.
(يغضب مصطفى كثيرا يقترب من سلمى ويصرخ قائلا)
_ انتي مش هتقفلي على السيرة دي بئى؟؟؟ ... ليه مش عايزة تفهمي انها كانت هتضربني بالنار بأي لحظة.
(سلمى)
_ والله هو كان ممكن فعلا ... اصل بالوضع الي هي كانت فيه اكيد ما كنتش واخدها بالها من الزناد كويس.
(سيد ممدوح)
_ فيه ايه ما تهدو شوية؟ ... مصطفى انت ليه شاكك ان حد فينا هو الي هرب روميو؟ .. كلنا بئينا عارفين ان نوسي عايشة وانها هي الي حابسانا هنا مع روميو.
(مصطفى)
_ بص يا سيد .. روميو ليه شريك تاني .. شريك غير نوسي وهو الي هربه وانا متأكد من الكلام ده كويس.
(سالي)
_ يا جماعة جيبو برفان وصحو علي وافهمو منه حصل ايه.
(سيليا)
_ انا معايا .... هطلع اجيب وارجع تاني.
(محمد فرج)
_ احنا عرفنا دلوقت مين عدونا ومين حابسنا هنا .. انما ما عرفناش هم عايزين مننا ايه وشروق فين ولا هي كمان معاهم؟؟
(حماده)
_ ده احتمال قوي على فكرة .. ممكن تكون شروق فعلا معاهم عشان كده لازم كلنا نمشي من المكان ده.
(سيد ممدوح)
_ اصبرو يا جماعة .. على الاقل شيكا وسالي يتحسنو شوية.
(تنزل سيليا من الاعلى ومعها العطر وتناوله لسيد الذي يحاول ايقاظ علي به)
(سيد ممدوح)
_ علي ... فوق يا علي ... انت كويس؟
(علي)
_ ها ... انا فين؟
(محمد كرويم)
_ صحصح يا علي .. قلنا مين الي عمل فيك كده؟
(علي)
_ ااااه .. صداع فظيع ... هرب مش كده؟ ... روميو هرب صح؟
(مصطفى)
_ ايوا هرب ... واحنا عايزين نعرف مين الي هربه؟
(سيليا)
_ مين الي ضربك يا علي؟ شفته؟؟
(علي)
_ مش هتصدقو لو قلتلكم ... هتفتكروني اتجننت ... بس انا متأكد ... انا شفت بعيني .. شفت قبل ما اوقع على الارض.
(سيد ممدوح)
_ شفت ايه يا علي؟؟؟

الحلقة رقم 21 من مسلسل اللعبة 3 Fc9d6d45fa

الى اللقــــاء فـــي الحلقــــة القــــادمـــــة ....

عضو العمر : 34

ليه كدة يا حنان يالله عليكي خلصت في حتة مهمة اوووووووووووووووووووووي بس هو كدة تقريبأ شاف نوسي صح ولا ايه

هههههههههههههههههههههههههههه والله انتى بتستهبلى ياحنان عشان بتقفلى الحلقة كدة فى اوقات مش مناسبة خالص هههههههههههههههه بس بجد الحلقة جاااااامدة

مشرفة العمر : 38

لا بئى مليش دعوة انا عايزة اعرف شاف ايييييييييه ؟
ماهى نوسى لسه كانت مع مصطفى وعين وسلمى

عضو العمر : 37

تسلم ايديك يانونتي هايلة
يادي المفجأاات اللي بتظهرلنا كل شوية
والمرعب ده اللي مبيثبتش

الإدارة العمر : 36

تسلم ايديكي يا حنان بجد الحلقة جامدة جداً طبعاَ شاف ....................... الي انا عرفته هههههههههههههههههههههههههههههههههههههههه

عضو العمر : 37

حلقه جميله جدا يانونا تسلمي ياقمر النهايه قربت هع

عضو العمر : 34

تسلم ايديك ياحنان الحلقه تحفه

وجايه على اهم نقطه ونعرف مين وحلقه تخلص

عموماا عايزين نعرف باقى المفجئات

» الحلقة رقم 11 من مسلسل اللعبة 3
» الحلقة رقم 12 من مسلسل اللعبة 3
» الحلقة رقم 13 من مسلسل اللعبة 3
» الحلقة رقم 23 من مسلسل اللعبة 3
» الحلقة رقم 14 من مسلسل اللعبة 3