الحلقة رقم 17 من مسلسل اللعبة 3

Admin العمر : 35

الحلقة رقم 17 من مسلسل اللعبة 3 0202a7136e

(سلمى)
_ في واحد وانتو مش هنا ضرب علينا حجارة كبيرة من الشبابيك .. وسالي دخل قزاز تحت رقبتها.
(مصطفى متفاجئا)
_ ايه؟ وهي فين دلوقت؟؟
(عين الحياة)
_ فوق .. احنا حاولنا نعالجها على قد ما نقدر.
(مصطفى)
_ طيب انا عايز اطلع اشوفها.
(عين الحياة)
_ تعالى معايا انا هدخل قبلك.
(يصعد مصطفى وعين الحياه للاعلى لرؤية سالي اما البقية في الصالة)
(محمد فرج)
_ ازاي نسيب الراجل ده ياخد راحته جوا كده؟
(سيد ممدوح)
_ كريم جوا معاه.
(محمد فرج)
_ انتو مش عارفين الراجل ده .. ده تعلب ... انا مش مطمن لوجوده كده .. لازم على الاقل نربطه.
(علي)
_ احنا ما صدقنا مسكناه .. لازم نربطه عشان نضمن انه ما يعملش حاجة فوق الي عملها لحد دلوقتي.
(سيد ممدوح)
_ يعالج شيكا الاول .. ونعرف شروق فين .. الوقت بيمر واحنا مش عارفين عنها حاجة.
(حماده)
_ تعالو نطلع احنا كمان لفوق نشوف سالي ونطمن عليها.
(سيد ممدوح)
_ اطلعو انتو .. انا هفضل هنا عشان اتأكد ان المجرم الي جوا مش هيعمل حاجة.
(سلمى)
_ انا هروح على المطبخ اشوف لو اقدر اعمل حاجة للاكل.

الحلقة رقم 17 من مسلسل اللعبة 3 081e0a9d8e

(في غرفة سالي حيث انها نائمة من المسكن)
(مصطفى)
_ كل ده حصل وانا مش موجود؟
(عين الحياة)
_ انت لو شفت سيل الحجارة الي نزل علينا .. وفجأة شفت سالي على الارض كلها دم ومغمى عليها .. كان هيصبني جلطة في قلبي لما شفتها كده.
(سيليا)
_ كله بسبب المجرم الي تحت .. احنا مستنين ايه لازم يقلنا شروق فين ونخلص عليه.
(في هذه الاثناء يقف على الباب كل من علي و حماده ومحمد فرج يريدون الدخول ولكنهم يقفون على الباب للاستماع للحديث)
(علي)
_ استنو شوية نسمع هيقولو ايه؟
(محمد فرج)
_ عيب كده مايصحش.
(علي)
_ هشش ... لازم نعرف عايزين يعملو ايه.
(مصطفى)
_ اصبري يا سيليا .. لازم يعالج شيكا الاول .. وبعدين كمان سالي .. طالما بيعرف يخيط الجروح لازم نستفيد منه .. وبعدين نعرف شروق فين.
(سيليا)
_ يعالج سالي كمان؟؟؟ .. ليه بئى ان شاء الله هو بئى دكتور؟
(عين الحياة)
_ ده بيعرف يخيط الجروح يا سيليا .. لو خيط جرح سالي هيخف انما تفضل كده ممكن تحصلها حاجة من النزيف.
(سيليا)
_ اي حد مننا ممكن يخيط الجرح ده ... انا ادوني مخدر وابره واخيطه ليها ومش محتاجينه.
(مصطفى)
_ والله؟؟ طيب كويس .. لو سمحتي يا عين جيبلنا ابرة وخيط وخلينا نشوف مهارة سيليا بئى.
(سيليا)
_ ايه؟ ... لا لا خلاص .. قصدي يعني ما عادش في داعي طالما روميو يقدر يعني.
(مصطفى)
_ شايف انك غيرتي رأيك ... بصي يا سيليا .. انا عايز اقتل روميو اكتر منك بكتير .. سنة كاملة وانا بفكر فيه .. سنة كاملة وانا بقول لنفسي لو شفته دلوقتي قدامي اقتله فورا حتى لو هاخد بيه اعدام .. ماحدش شاف منه الي انا شفته ... دخل حياتي من تلات سنين ودمرها .. عمري ما هرتاح وهو عايش .. بكل مكان بروحله .. بكل حفلة بطلعها .. بكل سفر ليا .. بكل ليلة بخرح فيها لوحدي .. بقول دلوقتي يطلع قدامي .. انا بئيت مريض بسببه .. السنة الي فاتت شيكا ضربني تلات رصاصات .. الي بكتفي مأثرة فيا لحد دلوقت وبكل حركة ليا بحس بوجع فيها ... والي في صدري .. لما بغني لما بتكلم لما بنام ولما بتحرك ولما بتنفس .. بحس بوجع في صدري ... ماحدش عايز الراجل ده ميت قدي .. ماحدش بيتوجع كل يوم منه قدي انا ... عارفة يعني ايه كل ما تتحركي حركة او حتى تتنفسي تحسي بوجع؟ ... والوجع ده يفكرك بيه وهو مش موجود ولا حاسس؟ ... انا كده بتوجع الف مرة باليوم بسببه .. وبفتكره الف مرة .. وبقول لروحي باليوم الف مرة لازم الراجل ده يموت ...
(سيليا)
_ يااااااه كل ده جواك؟ .. وسايبه عايش ليه ده دمرلك حياتك؟
(مصطفى)
_ سايبه بس لحد ما نعرف شروق فين ونرجعها .. البنت دي مالهاش اي ذنب .. ولازم زي ما خطفها بسببي ان انا اتحمل من تاني لحد ما نرجعها سليمة ... يعني انا بين نارين .. بستحمل نار وجوده جنبي من جهة ونار خطف شروق من جهة تانية ... وده اصعب احساس بحسه بحياتي .. طول الفترة الي فاتت عايز امسكه ولما بئى قدامي بئيت مضطر ادافع عن حياتي واحميه عشان حياة شروق.
(عين الحياة)
_ ودلوقت كمان عشان شيكا وسالي ... طالما يقدر يساعد.
(سيليا)
_ انا ماكنتش اعرف انه مأثر بيك اوي كده ... يعني انت كنت بترفض تقابلنا طول السنة الي فاتت بسببه؟
(مصطفى)
_ عارف ان مالكمش ذنب انما كان بردو صعب عليا وانا بتوجع كده اشوف شيكا من تاني واتعامل معاه عادي وانا في الوضع ده.
(عين الحياة)
_ خلاص يا جماعة الحمدلله اننا عرفنا نمسكه دلوقت .. ولما نعرف شروق فين اعملو الي انتو عايزينه .. مع ان انا ضد القتل طبعا .. انا شايف اننا لازم نسلمه للبوليس احنا مش مجرمين.
(في هذه الاثناء يقف على الباب كل من علي و حماده ومحمد فرج يستمعون للحديث ويتحدثون بصوت منخفض)
(حماده)
_ خلاص بئى كفاية كده عيب.
(محمد فرج)
_ انا نازل تحت.
(علي)
_ ماله زعل؟؟
(حماده)
_ مش عارف ... المهم احنا يا ندخل يا ننزل مايصحش كده.
(علي)
_ تعالا ننزل نتكلم براحتنا تحت.

(في الاسفل حيث يدخل محمد فرج الى احدى الغرف وهو قلق ويتبعه حماده وعلي ويغلقون الباب ورائهم)
_ مالك يا محمد في ايه؟
(محمد فرج)
_ انا بغلي ... اول مرة اعرف السبب الي خلى مصطفى يبعدنا عنه بالشكل ده ... روميو لازم يتقتل ... انتو مش عارفين هو ممكن يعمل ايه؟
(حماده)
_ انا شايف اننا لازم نربطه .. لحد ما نعرف شروق فين.
(محمد فرج)
_ ماحدش يعرف روميو قدي ... هيعرف يدخل بينا من جديد .. انا اعرفه كويس هيعرف يدخل بينا من جديد... مش هسيب مصطفى ابدا ده بيستمتع ب الي بيعمله.
(علي)
_ انت خايف اوي كده ليه؟ .. عايز تقول ايه؟
(محمد فرج)
_ مش عارف اوضح ازاي بس انا تعاملت مع الراجل ده واعرفه .. هيعرف يدخل بينا من جديد .. هيلاقي طريق من تاني يلعب بينا فيه ويفرقنا عن بعض.
(حماده)
_ انت بتبالغ يا محمد .. مافيش داعي لكل القلق ده الراجل ده خلاص اتمسك وشوي وينتهي.

(في غرفة شيكا حيث ينتهي من علاج شيكا)
(محمد كرويم)
_ خلصت؟
(روميو)
_ ايوا خلاص ... اظن انه هيفوق لوحده لما اثر المخدر يخف .. هيصحى من الوجع.
(محمد كرويم)
_ طيب .. يلا قدامي .. امشي ..
(روميو)
_ هنروح فين؟
(محمد كرويم)
_ هنشوف هنعمل بيك ايه؟

(في الصالة .. حيث يجتمع الكل ويجلس روميو على احدا الكراسي ويترقب ماذا سيقرر الجميع بخصوصه)
(روميو)
_ هتفضلو ساكتين كده؟ ... انتو خجلانين مني ولا ايه؟
(سيد ممدوح)
_ قلنا شروق فين وبعدها نفكر نديك فرصة تانية ونتركك.
(سيليا)
_ نتركه ازاي .. ده قتل نوسي.
(سلمى)
_ هو يدلنا الاول على مكان شروق وبعدين نشوف هنعمل ايه؟
(روميو)
_ انا ماعرفش هي فين .. انما اعرف مين الي خطفها؟
(مصطفى)
_ تقصد شريكك الي جابك لهنا ورانا.
(محمد فرج)
_ ابتدينا كلام فارغ .. الراجل ده لو اديتوله فرصة يتكلم هيخرب الدنيا.
(يضحك روميو قائلا)
_ والله يا محمد انت وحشتني بجد .. فاكر السنة الي فاتت لما كنا بنشتغل مع بعض؟ ... لولا انك ضعفت بالاخر واعترفت كنا خلصنا من وقتها.
(محمد فرج)
_ دي كانت ايام سودا.
(روميو)
_ ابئى فكرني لما نخلص من هنا كلنا نرجع نشتغل مع بعض من تاني .. احنا كنا ثنائي جميل بجد.
(محمد فرج)
_ نشتغل ايه انت مجنون؟
(روميو)
_ نكمل الشغل الي ابتديناه قبل كده انا وانت ... ماتزعلش يا مصطفى عشان انا صريح قدامك بس انا بئالي زمان مش مخطط لحاجة وبصراحة وحشني اللعب معاك من جديد.
(حماده)
_ يا جماعة الراجل ده بيحاول يفهمنا انه ماليش دخل ب الي بيحصل هنا ... احنا كده بنضيع وقتنا معاه.
(روميو)
_ انا فعلا ماليش دخل بحاجة والكلام ده انا قلته لمصطفى واحنا جاين على هنا وهو صدقني خلاص.
(ينظر الجميع لمصطفى باستغراب متفاجئين فيرد مصطفى بغضب)
_ صدقتك ده ايه انت مجنون؟
(محمد فرج)
_ انا قلت يا جماعة الراجل ده بيتسلى فينا ... احسن حاجة لو مش هيدلنا على شروق اننا نموته.
(روميومستهزئا)
_ لا ارجوكم بلاش تموتوني .. انا خايف جدا.
(محمد كرويم)
_ يعني عايز تقول انك مش خايف؟ ايه فاكر اننا مش هنموتك؟
(روميو)
_ مصطفى مش ممكن يسمح بان حد فيكم يلمسني .. عشان انا وهو اتفاهمنا خلاص هخاف من ايه؟
(سلمى)
_ احنا دمنا محروئ وخايفين على شروق وانت بتهزر وفرحان ... لو مش هتقول شروق فين احنا هنخلص منك ونقتلك.
(روميو)
_ ومين الي هيعمل كده؟؟ ... انتي؟؟؟؟ بلاش تضحكيني حرام عليكي روحي شوفيلك لعبة تلعبي بيها يا ماما وسيبي الكلام للكبار.
(روميو يستفز سلمى فتغضب كثيرا وتهجم عليه)
_ انت قليل ادب انا هوريك مين هي سلمى .. انا هقتلك.
(روميو)
_ ابعدي عني يا مجنونة ايه ده؟
(تقترب عين الحياة من سلمى وتبعدها عن روميو قائلة)
_ خلاص يا سلمى اهدي شوي.
(سلمى)
_ انا لازم اعرفه قيمته الحقير ده.
(علي)
_ خلاص يا جماعة الراجل ده مش هيتكلم .. احنا ننزله لتحت على القبو بالبرد وسط الفيران ونربطه هناك ونشوف هيستحمل قد ايه.
(حماده)
_ والله فكرة يا علي ... انت جبتها والله .
(سيد ممدوح)
_ وانا شخصيا موافق .. احنا بس ندور على حبل هنا ونربطه تحت.
(روميو)
_ بتضيعو وقتكم يا جماعة .. قلتلكم انا اعرف مين الي حابسكم هنا اسمعو كلامي.
(محمد كرويم)
_ بلاش كلام فارغ .. انت هتطلع معانا الاول تعالج سالي وبعدين ننزلك لتحت.
(روميو)
_ ليه؟ مالها سالي هي كمان؟
(عين الحياة)
_ عامل نفسه مش عارف يعني.
(روميو)
_ لا يا ختي مش عارف وهعرف منين ... قلتلكم قبل كده انا ماليش دخل بحاجة .. في حد غيري ليه مصلحة انكم تفضلو هنا محبوسين فكرو وانتو تعرفوه .. وبعدين مش هتستفيدو حاجة لو ربطوني تحت لان مصطفى حيفكني وحيهربني.
(سيد ممدوح)
_ يلا بينا نشوف سالي وبلاش كتر كلام.
(روميو)
_ هو ده الي انتو فالحين بيه ... بس عايزين خدمات روميو انما حد يسمعني مافيش .. عموما انا حزرتكم مصطفى حيهربني عشان انا اساسا متفق معاه.

(في وقت لاحق وبعد ان يعالج روميو سالي .. يربطه محمد كرويم مع علي وحماده ويقومون بانزاله للقبو في الاسفل)
(حماده)
_ احنا هنعمل مناوبة عليه .. كل واحد مننا يحرسه شوية .. لحد ما يتعب ويقرر يعترف بمكان شروق.
(روميو)
_ و دور مصطفى امتى يجي بئى؟
(محمد كرويم مستهزئا)
_ ايه عايزه يجي يغنيلك؟
(روميو)
_ فكرة بردو .. انما لا مش كده انا بس عايزه يهربني من هنا.
(علي)
_ ده مجنون والله.
(يضحك روميو قائلا)
_ بكرا نشوف مين فينا المجنون لما امشي من هنا .

(بعد مرور بعد الوقت في غرفة سالي التي تستيقظ)
(سالي)
_ كل ده حصل وانا نايمة؟
(سيليا)
_ انتي كنتي محمومة جدا .. بس الحمدلله دلوقت بئيتي احسن.
(سالي)
_ وشيكا عامل ايه؟
(عين الحياة)
_ لسى مش صاحي .. نايم تحت وكريم جنبه.
(سالي)
_ مصطفى عرف ب الي حصلي؟
(عين الحياة)
_ ايوا عرف وكان هنا جنبك من شوي واطمن عليكي بس انتي كنتي نايمة.
(سلمى)
_ خفي بسرعة يا سالي عشان نمشي من هنا كلنا.
(سالي)
_ ليه هو سيد هيمشينا من هنا خلاص؟
(سلمى)
_ نصبر شوية بس تتحسني انتي وشيكا ونجيب شروق ونمشي.
(عين الحياة)
_ هنروح فين طيب؟ ... هو احنا هنعرف نمشي منين؟
(سلمى)
_ حنفضل نمشي لحد ما نلاقي تغطية للتلفون ونتكلم مع اي حد يساعدنا المهم اننا نمشي من هنا.
(سيليا)
_ هو مش المفروض ان روميو يكون معاه عربيه؟
(عين الحياة)
_ اه صحيح .. اكيد معاه عربيه ولا ماكنش عرف يجي هنا.
(سلمى)
_ بس مش هيدلنا عليها ... اكيد هيفضل ساكت عشان يجننا واحد واحد.
(عين الحياة)
_ طيب ما ندور عليها احنا؟
(سالي)
_ يا بنات ... هو خلاص ماعادش في خطر علينا؟ .. ولا روميو معاه حد مننا بيساعده؟
(عين الحياة)
_ اكيد معاه حد بيساعده.
(سالي)
_ يبئى احنا مش لازم نطمن ... ولو حد اتكلم عن العربية منكم قدام الكل ... شريك روميو هيروح للمكان الي فيه العربية وهيبوظ عجالها بردو عشان نفضل هنا.
(سيليا)
_ اه والله يا سالي معاكي حق ... لو كان المجرم التاني حد من الشباب اكيد هيعمل كده فعلا.
(عين الحياة)
_ ده لو كان حد من الشباب مش مننا احنا.
(سلمى)
_ انا بريئة .. ده انا اكتر وحدة بكره روميو.
(سيليا)
_ طيب والعمل؟ ... نعمل ايه عشان نوصل للعربية ونمش من هنا ونجيب حد يساعدنا؟
(سالي)
_ انا ... انا عندي حل .. بس في خطر كبير.
(عين الحياة)
_ اتكلمي يا سالي حل ايه؟

الحلقة رقم 17 من مسلسل اللعبة 3 Eba6f0a5ab

الى اللقــــاء في الحلقــــة القادمـــــة

عضو العمر : 28

تسلم ايديكي يا حنان روعة والله حلقة جامدة موت بس روميو بيستعبط عايزنا نشك في مصطفى

الإدارة العمر : 36

حلقة جميلة جداً تسلم ايديكي يا حنان انتي مبدعة والله بس كنتي سيبتي سلمى عليه تضربه يا بنتي اصله يستاهل عمالة يتريق على العيال مجنون والله ههههههههههههههههههههههههههههه ورخم كمان

مشرفة العمر : 38

جميلة اوووووووووى يا نونة وخصوصا الكام سطر دوووول ابدعتى فيهم واثروا فيا وصعب عليا قمر اوووى وكنت هدمع بجد

انا عايز اقتل روميو اكتر منك بكتير .. سنة كاملة
وانا بفكر فيه .. سنة كاملة وانا بقول لنفسي لو شفته دلوقتي قدامي اقتله
فورا حتى لو هاخد بيه اعدام .. ماحدش شاف منه الي انا شفته ... دخل حياتي
من تلات سنين ودمرها .. عمري ما هرتاح وهو عايش .. بكل مكان بروحله .. بكل
حفلة بطلعها .. بكل سفر ليا .. بكل ليلة بخرح فيها لوحدي .. بقول دلوقتي
يطلع قدامي .. انا بئيت مريض بسببه .. السنة الي فاتت شيكا ضربني تلات
رصاصات .. الي بكتفي مأثرة فيا لحد دلوقت وبكل حركة ليا بحس بوجع فيها ...
والي في صدري .. لما بغني لما بتكلم لما بنام ولما بتحرك ولما بتنفس ..
بحس بوجع في صدري ... ماحدش عايز الراجل ده ميت قدي .. ماحدش بيتوجع كل
يوم منه قدي انا ... عارفة يعني ايه كل ما تتحركي حركة او حتى تتنفسي تحسي
بوجع؟ ... والوجع ده يفكرك بيه وهو مش موجود ولا حاسس؟ ... انا كده بتوجع
الف مرة باليوم بسببه .. وبفتكره الف مرة .. وبقول لروحي باليوم الف مرة
لازم الراجل ده يموت ..

الإدارة العمر : 32

حلقة جاااااااااااامدة قوييييييييييييي يانونا تسلم ايديكي ياقمر

Admin العمر : 35

سالى قمر كتب:: جميلة اوووووووووى يا نونة وخصوصا الكام سطر دوووول ابدعتى فيهم واثروا فيا وصعب عليا قمر اوووى وكنت هدمع بجد

انا عايز اقتل روميو اكتر منك بكتير .. سنة كاملة
وانا بفكر فيه .. سنة كاملة وانا بقول لنفسي لو شفته دلوقتي قدامي اقتله
فورا حتى لو هاخد بيه اعدام .. ماحدش شاف منه الي انا شفته ... دخل حياتي
من تلات سنين ودمرها .. عمري ما هرتاح وهو عايش .. بكل مكان بروحله .. بكل
حفلة بطلعها .. بكل سفر ليا .. بكل ليلة بخرح فيها لوحدي .. بقول دلوقتي
يطلع قدامي .. انا بئيت مريض بسببه .. السنة الي فاتت شيكا ضربني تلات
رصاصات .. الي بكتفي مأثرة فيا لحد دلوقت وبكل حركة ليا بحس بوجع فيها ...
والي في صدري .. لما بغني لما بتكلم لما بنام ولما بتحرك ولما بتنفس ..
بحس بوجع في صدري ... ماحدش عايز الراجل ده ميت قدي .. ماحدش بيتوجع كل
يوم منه قدي انا ... عارفة يعني ايه كل ما تتحركي حركة او حتى تتنفسي تحسي
بوجع؟ ... والوجع ده يفكرك بيه وهو مش موجود ولا حاسس؟ ... انا كده بتوجع
الف مرة باليوم بسببه .. وبفتكره الف مرة .. وبقول لروحي باليوم الف مرة
لازم الراجل ده يموت

..

بجد يا سالي؟ هو فعلا مشهد حلو انا عجبني جدا وانا بكتبه ميرسي ليكي يا قمر الحمدلله انه عجبك bounce

Admin العمر : 35

ميرسي يا جماعة Rolling Eyes

عضو العمر : 37

تسلمي ياقمر روعه الحلقه

هههههههههههههههههههههههههههه وربنا حلقة جامدة يانونة واى خدمة عمال اعالج فيكم اهوة افتكروا الجمايل دى هههههههههههههههههههههه

» الحلقة رقم 13 من مسلسل اللعبة 3
» الحلقة رقم 23 من مسلسل اللعبة 3
» الحلقة رقم 14 من مسلسل اللعبة 3
» الحلقة رقم 15 من مسلسل اللعبة 3
» الحلقة رقم 16 من مسلسل اللعبة 3