الحلقة رقم 14 من مسلسل اللعبة 3

Admin العمر : 35

الحلقة رقم 14 من مسلسل اللعبة 3 3944d843b2

(سيليا تنهمر بالبكاء)
_ نوسي؟؟؟ .... نوسي هي الي كانت متعلقة؟؟؟
(تجلس عين الحياة مصدومة وتقول)
_ نوسي ... بس ازاي؟
(سالي)
_ يعني الي احنا شفناها كانت ... نوسي؟؟
(علي)
_ بالضبط ... هي نوسي ... على الاغلب روميو زئها من المنحدر العالي وبعدين جابها وعلقها على الشجرة.
(محمد فرج)
_ ازاي؟؟؟ ... اكيد مش هيعرف يجرها لوحده من هناك.
(مصطفى)
_ طبعا مش هيعرف يجرها لوحده .. في حد مننا بيساعده.
(شيكا)
_ في حد مننا خاين ... نوسي دلوقتي خلاص ماتت لكن لسى في امل ننقذ شروق ونعرف نخرج من هنا .. لازم شريك روميو يعترف ودلوقتي حالا ...قبل ما الحكاية تكبر اكتر من كده.
(سالي برعب)
_ اكيد الي شارك روميو في قتل نوسي مش هيعترف بعملته ... مش هيتجرأ ... اكيد هو شايف ان الحل الوحيد قدامه يموتنا كلنا.
(حماده)
_ عشان كده لازم نمشي من هنا النهاردة حالا .. شوية وتطلع الشمس لازم نهرب من هنا قبل ما نتقتل كلنا.
(سيليا)
_ وشروق؟؟ ... هنسيبها ونهرب؟
(علي)
_ طالما ماحدش معترف انه شريك روميو واكيد مش هيعترف يبئى مافيش قدامنا غير الهرب.
(سيليا)
_ انا مش همشي من غير شروق.
(سيد ممدوح)
_ ولا انا كمان.
(حماده)
_ يعني ايه؟ ... هتفضلو هنا؟؟؟
(سيد ممدوح)
_ انا ما قدرش ارجع من غيرها ... ما عرفناش نقرب من نوسي ونجيب جثتها عشان عارفين ان روميو اكيد محضرلنا فخ هناك ... لكن شروق لسى في امل انها تكون عايشة .. لازم اجيبها قبل ما نمشي من هنا.
(عين الحياة)
_ لو انت هتفضل هنا يا سيد احنا ازاي هنعرف نرجع لوحدنا؟؟؟ احنا ما نعرفش سكة للخروج من هنا.
(سيد ممدوح)
_ ولا انا اعرف.
(عين الحياة)
_ بس وانت معانا على الاقل نطمن ... وانت يا مصطفى هتعمل ايه انت كمان؟
(حماده)
_ اكيد هيجي معانا طبعا.
(مصطفى)
_ لأ ... دي حربي انا ... وانا قررت اواجه.
(سيليا بانفعال)
_ يعني ايه؟؟؟ انت كمان هتفضل هنا؟ .. هتواجه روميو ازاي؟ ده انت غرضه الاساسي.
(سيد ممدوح)
_ سيليا لو سمحتي ..
(سيليا)
_ خلاص ارجوكم انا ماعدتش قادرة اسكت اكتر من كده ... كلنا عارفين ان روميو عايز ينتقم مننا كلنا واولنا مصطفى ... لو فضلت هنا يا مصطفى روميو هيقتلك زي ما قتل نوسي.
(شيكا)
_ لو مصطفى ما طلعش معانا الرحلة دي ما كانش حصل كل الي حصل ده وكانت نوسي هتبئى عايشة.
(مصطفى)
_ جايز يكون كلامك صحيح ... جايز انا غلطت لاني جيت معاكم الرحلة دي ..عشان كده انا شايف انكم تمشو كلكم من هنا ... انا هفضل هنا وهواجه روميو ... دي معركتي والمرادي مش ههرب منها.
(سيليا)
_ على فكرة الكلام ده مش مزبوط ... روميو عايز بنتقم مننا كلنا مش منك انت لوحدك يا مصطفى ... ولو قدر عليك دلوقت هيجي الدور علينا احنا واحد واحد.
(حماده)
_ يا جماعة ارجوكم اسمعو كلامي ... احنا كلنا نمشي من هنا .. شروق خلاص مش هنعرف نجيبها اكيد خسرناها زي نوسي مش ضروري كلنا نلحئهم كمان.
(شيكا)
_ نمشي من هنا ازاي احنا خلاص اتورطنا ... لو مشينا جايز شريك روميو يكون واحد مننا وينصب لنا فخ.
(سالي)
_ هو انتو متأكدين ان في واحد مننا شريك روميو؟؟
(سيد ممدوح)
_ ايوا طبعا .. لان روميو ما كنش هيعرف لوحده يعمل كل ده ... وبعدين هو محتاج لحد يقوله على تحركاتنا ويوصله كل معلومة عننا.
(سلمى)
_ يعني في واحد مننا هو الي دل روميو على مكان رحلتنا عشان يجي ورانا .

الحلقة رقم 14 من مسلسل اللعبة 3 2b2b258f83

(في مكان اخر)
(شروق)
_ انت هتسيبني هنا لحد ايمتى انا تعبت؟
(مجهول)
_ لحد ما يجي حد ينقذك ... ولو ماحدش عرف ينقذك يبئى احسن .. انا خارج استني هنا لحد ما ارجع .. طبعا هتنستني هو انت تقدري تمشي اساسا؟
(شروق)
_ انت فاكر ان الحكاية بتضحك؟ انت نهايتك هتبئى سودا.
(مجهول)
_ وانتي نهايتك قربت .. اصبري بس لحد ما ارجع.

الحلقة رقم 14 من مسلسل اللعبة 3 D8b79c40e5

(في المنزل من جديد .. يجلس الجميع بتوتر تام دون كلام ... حماده يتحرك بقلق وتوتر في الصالة ذهابا وايابا ثم يقول)
_ هنفضل هنا لحد ايمتى؟ .. انتو بجد مصرين تفضلو هنا؟
(سيد ممدوح)
_ احنا بنفكر هنعمل ايه وهنرجع شروق ازاي.
(سيليا)
_ انا تعبانة اوي احنا طول مبارح بنمشي من مكان لمكان وبندور عليها .. لو ماكناش هنخرج ندور من تاني انا هطلع فوق انام شوية.
(عين الحياة)
_ هتقدري تنامي بعد الي حصل؟
(سيليا)
_ هحاول .. انا تعبانة اوي واظن كلكم محتاجين ترتاحو.
(سالي)
_ انا هطلع معاكي .. عايزة انام وانسى منظر الجثة الي شفتها.
(محمد فرج)
_ انا من رأيي جزء مننا يفضل هنا ويرتاح وجزء تاني يطلع يدور على شروق .. انا ممكن اطلع ادور عليها دلوقتي حالا.
(حماده)
_ ماحنا دورنا مبارح في كل حتة ومعرفناش نجيبها .. هندور فين بئى؟
(محمد فرج)
_ نجرب تاني يا حماده مافيش قدامنا حل غير كده.
(شيكا)
_ والله انا شايف اننا لازم نتفاوض مع روميو .. الراجل خاطف شروق هندور عليها فين؟
(يقف مصطفى منزعجا من تلميح شيكا قائلا)
_ عارف حاجة .. انا مش مضطر افضل هنا واسمع تلميحاتك كل شوي.
(شيكا)
_ طالما كده اعمل حاجة .. اتصرف عشان ما نخسرش شروق زي ما خسرنا نوسي.
(عين الحياة)
_ هيعمل ايه يعني يا شيكا؟ لو عندك حل قوله ولو مافيش بلاش تفتعل مشاكل.
(شيكا)
_ كل الي انا عارفه ان شروق ممكن تتقل في اي لحظة .. واحنا هنا قاعدين ومش بنعمل حاجة .. ومصطفى ممكن يحلها .. انا ما قلتش اننا لازم ندي روميو فلوس او اي حاجة هو عايزها لكن احنا ممكن نوهمه اننا موافقين عشان يرجع شروق.
(علي)
_ وهنعمل كده ازاي؟ ... الراجل مستخبي.
(مصطفى)
_ انا هطلع ادور عليه.
(سيد ممدوح)
_ خد حد معاك يا مصطفى.
(مصطفى)
_ لأ ... طالع لوحدي .. جايز ما نعرفش نوصل لروميو لكن هو هيعرف يوصلي.
(يخرج مصطفى من المنزل منزعجا في حين يقف علي بعصبية قائلا)
_ شفت حضرتك عملت ايه؟؟ ... يعني لو روميو عمله حاجة دلوقتي هنعمل احنا بيك ايه؟
(شيكا)
_ انا .. ماقلتلوش يروح لوحده.
(سيد ممدوح)
_ كلامك طول الوقت معناه كده يا شيكا.
(علي)
_مش معقولة نفضل هنا ومصطفى برا لوحده لازم نعمل حاجة.
(شيكا)
_ انا هروح وراه.
(سيد ممدوح)
_ رجعه يا شيكا لو سمحت .. كمان شوية نطلع كلنا مع بعض ندورعلى شروق من تاني.
(يخرج شيكا من المنزل بحثا عن مصطفى ليعيده ظاننا انه لم يبتعد بعد)

الحلقة رقم 14 من مسلسل اللعبة 3 F8ce212a49

(في الاعلى في الغرفة حيث تحاول كل من سيليا وسالي النوم)
(سالي)
_ سيليا ... عرفتي تنامي؟
(سيليا)
_ لأ ... بفكر.
(سالي)
_ بتفكري ب ايه؟
(سيليا)
_ بحاول اعرف مين الي كان عنده فرصة يتحرك بسهولة مننا ويساعد روميو؟
(سالي)
_ انا شاكة بحاجة.
(سيليا تنهض من الفراش قائلة باهتمام)
_ شاكة ب ايه؟
(سالي)
_ انا حاسة ان الي عمل كل ده بنت .. اكيد بنت عشان عارفة اننا هنشك ب ان واحد من الشباب هو شريك روميو لان ماحدش هيشك ببنت تقدر تعمل كل ده.
(سيليا وقد فقدت حماسها)
_ مش شرط .. بردو ممكن يكون واحد من الشباب.
(سالي)
_ لأ بنت وانا هقلك ليه.
(سيليا)
_ ليه؟
(سالي)
_ روميو عايز ينتقم مننا كلنا دي احنا عارفينها .. لكن شريكه عايز ايه؟ .. لو كان راجل يبئى عايز الفلوس طبعا ... والفلوس مش ممكن تيجي واحنا محبوسين هنا.
(سيليا باهتمام)
_ قصدك تقولي ان شريك روميو بنت عشان غرضها حاجة تانية.
(سالي)
_ اه بنت .. لان البنت ممكن يكون ليها غرض تاني .. ممكن تكون مجنونة بمصطفى .. او حتى بسيد .. عشان كده شاركت روميو وقدر يقنعها تساعده.
(سيليا)
_ واكيد لو راجل مش هيورط نفسه بالقتل من غير حتى ما ياخد فلوس.
(سالي)
_ انا شايفة انها بنت ... ممكن تكون اي وحدة مننا او حتى ممكن تكون وحدة من البنات الي كنا نعرفهم زمان .. اي حد من البنات الي بيحبو مصطفى ممكن يعملو كده.
(سيليا)
_ وهنعرف هي مين ازاي؟؟؟
(سالي)
_ المهم اننا مسكا طرف الخيط دلوقتي ... واكيد هنعرفها.

****************************************************************

(في مكان اخر حيث يتمشى مصطفى بعيدا عن المنزل بحذر تام وبقلق مستكشفا للمكان على أمل ايجاد شروق او اي دليل على وجودها في اي مكان ومتوجها باتجاه النور الذي رأه حين كان مع محمد كرويم وفجأة يأتي صوت من ورائه يحدثه)
_ مصطفى .....
(يلتفت مصطفى ليرى من يناديه .. فيراه دون قناع او اي شيء يخفي شخصيته يتفاجئ وقبل ان يقول شيئا)
(يضحك الرجل قائلا)
_ انا كنت خارج اصطاد ... بس ماخطرش ببالي ابدا .. اني اصطادك انت مرة وحدة.
(مصطفى)
_ ما تكونش متأكد .. جايز انا الي اصطدتك ....

الى اللقــــاء فـــي الحلقــــة القـــادمــــة ....

الحلقة رقم 14 من مسلسل اللعبة 3 22cb76047a

مشرفة العمر : 38

هيصطاااااد مين يا نونة قووووووولى قووووووووولى يلا بسرعة
قولى اللهى يارب ربنا يكرمك ويفرحك وتبئى اشهر سيناريست فى الدنيا دى كلها هههههههههه

المدير العام العمر : 41

تسلم ايدكى شغل جامد ياقمر

Admin العمر : 35

سالى قمر كتب:: هيصطاااااد مين يا نونة قووووووولى قووووووووولى يلا بسرعة
قولى اللهى يارب ربنا يكرمك ويفرحك وتبئى اشهر سيناريست فى الدنيا دى كلها هههههههههه

هههههههههههههههههه ربنا يكرمني يا سالي وكل الدعاوي دي عشان المجرم اصطاد قمر هههههه لالالالالالالالالالالا انا عايزة افهم بئى Shocked

Admin العمر : 35

MR kimo كتب:: تسلم ايدكى شغل جامد ياقمر

ميرسي يا كيمو منور شفت شغلي ولا بس اطلعت عليه على السريع؟ يشرفني وجودك عموما معانا ميرسي Very Happy

الإدارة العمر : 36

تسلم ايديكي يا حنان على الحلقة الجميلة ههههههههههههههههههههههههههههههههه هو اصطاد سمكة يا نوسي بس السمكة بتتكلم ههههههههههههههههههه

الإدارة العمر : 32

مصطفي قمر ده طلع زكي قوي عرف يوصل للمجرم اللي كان معاهم في البيت مصطفي أصر إنه يخرج لوحده عشان عارف ان الشريك هيخرج وراه بس مين هو لسه مش عارف ههههههههههههه

ههههههههههههههههههههههههههههه والله انا كنت طالع اصطاد غزالة وقع مصطفى قدامى يلا اهو جية لوحدة ههههههههههههههههههههههههههههه بس على فكرة بقى يانونة نوسى مش ميتة وشروق مش هتموت والشريك انا هعرفة كدة كدة لانة معايا طبعا ههههههههههههههههههههههههه بس انا شاكك فى الواد حمادة بصراحة لانة جبان اووووى وهو الوحيد اللى ظاهر علية الخوف والرعب اكتر من الباقى وانا حاسس ان دا كلة مجرد لعبة هو بيعملها عليهم مش عارف اذا كنت صح ولا لاء بس خوف حمادة فعلا مش طبيعى خااااااالص وبجد الحلقة جناااااااااااااااااااان وياريت تنزلى بقى اللى بعدها انا بقالى اسبوع غايب بسبب النت الزبالة دا

عضو العمر : 38

لالالالالالالالالالالالالا كملى مش هسيبك الا لما تكملى يالا يابت بلاش كسللللللللللللللللللللللللللللللللللللللللللل

عضو العمر : 37

حلقه جميله يانونا اووووووووووي

» الحلقة رقم 19 من مسلسل اللعبة 3
» الحلقة رقم 21 من مسلسل اللعبة 3
» الحلقة رقم 22 من مسلسل اللعبة 3
» الحلقة رقم 15 من مسلسل اللعبة 3
» الحلقة رقم 11 من مسلسل اللعبة 3