الحلقة رقم 13 من مسلسل اللعبة 3

Admin العمر : 35

الحلقة رقم 13 من مسلسل اللعبة 3 46fdee2c92

(مجهول يتحدث مع شروق المثبة بالكرسي والتي تبكي بشدة قائلة)
_ انت عايز مني ايه؟؟؟ سبني امشي من هنا حرام عليك.
(الشخص المجهول)
_ كفاية دوشة .. انتي ما تتعبيش من العياط ده كله؟
(شروق)
_ سبني انت عايز مني ايه؟
(الشخص المجهول)
_ يا بت اسكتي انتي مستعجلة على الخروج من هنا اوي كده ليه؟ انت قدام المرعب شخصيا ولازم تكوني فرحانة بالشرف ده.
(شروق تصيح)
_ انا عايزة امشي من هنا بقلك .. لو عملت فيا حاجة اهلي هيعرفو يوصلولك وهيموتوك .. هيقطعوك حتت.
(الشخص المجهول يضحك)
_ اهل مين؟ هو في حد هيعرف يوصلك هنا؟ ... اطمني ما حدش هيعرف يوصل للجثة.
(شروق)
_ جثة؟ انت هتموتني؟ .. يا ناس ساعدوني ...
(الشخص المجهول)
_ اصرخي زي مانتي عايزة .. شوية وتلحئي نوسي.

الحلقة رقم 13 من مسلسل اللعبة 3 83ab6477fe

(في مكان اخر .. في الغابة حيث يبحث الجميع عن شروق في مجموعات وفي مكان بحث كل من محمد فرج وحماده وعلي)
(حماده)
_ شرووووق ... شروق انت سامعانا؟
(علي)
_ بئالنا كتير بندور مافيش حاجة.
(محمد فرج)
_ استنو شوية يا جماعة .. في صوت ..
(حماده)
_ صوت ايه؟
(محمد فرج)
_ هشش .. استنى .. في حاجة بتتحرك حولينا.
(يصمت الجميع شاعرين بحركة من حولهم ولكن دون ان يظهر احد)

الحلقة رقم 13 من مسلسل اللعبة 3 C1ee4e6c45

(علي)
_ مين هنا؟؟ .. اطلع يا جبان ... هنلاقيك هنعرف نجيبك اخرج.
(حماده)
_ مين ده؟ .. معقولة روميو؟
(محمد فرج)
_ جايز يكون ديب ولا حاجة.
(علي)
_ هو ايه الي بيحصلنا ده يا جماعة؟ .. في حد بيتعمد يتعبلنا اعصابنا.
**************************************************
(في مكان اخر حيث يبحث مصطفى ومحمد كرويم عن شروق)
(محمد كرويم)
_ يلا بينا نرجع احنا بعدنا اوي ما اظنش انها هنا.
(مصطفى)
_ ايه المكان ده؟ .. محمد تعالا .. تعالا شوف.
(محمد كرويم)
_ في ايه؟
(يشير مصطفى باتجاه ضوء يراه قائلا ل محمد كرويم)
_ شايف هناك .. في نور من بعيد.
(محمد كرويم)
_ ايه النور ده؟ .. معقولة يكون بيت؟
(مصطفى)
_ ممكن .. يلا بينا نروح نشوفه.
(محمد كرويم)
_ لا نروح فين؟ .. اولا احنا لوحدنا هنا ثانيا النور ده ضعيف جايز يكون اي حاجة.
(مصطفى)
_ وجايز يكون ده المكان الي روميو مستخبي بيه.
(محمد كرويم)
_ ما ينفعش تروح .. لو كان روميو هناك مش هتقدر عليه لوحدك لازم نرجع ونقول للباقي.
(مصطفى)
_ مش قادر اصدق انه يكون قريب مني اوي كده وما عرفش اروحله .. ده انا بئالي اكتر من سنة بدور عليه.
(محمد كرويم)
_ مش ده المهم .. المهم نلاقي شروق.
(في هذه اللحظة وفجأة يسمع صوت صراخ البنات يتفاجئ مصطفى ومحمد كرويم مسرعين باتحاه الصوت وفي كل مكان يتجه الجميع باتجاه الصوت مسرعين)
(سلمى تركض بذعر شديد هي وسالي ويصرخان من الخوف وفجأة يصل الجميع اليهم محاولين تهدئتهم)
(سيد ممدوح)
_ ايه مالكم في ايه؟
(سلمى)
_ هناك .... هناك ... سيد .. هناك ورانا.
(شيكا)
_ في ايه يا سلمى شفتو ايه؟
(سالي)
_ كانت هناك متعلقة ... شفناها وهربنا.
(سيليا)
_ هي مين الي كانت متعلقة؟؟؟
(سلمى)
_ حتكون مين ... هي شروق ... قتلها و ... وعلقها على الشجرة هناك.

الحلقة رقم 13 من مسلسل اللعبة 3 65cbb4adb4

(عين الحياة)
_ شروق ماتت ؟؟؟؟
(شيكا)
_ دلونا على المكان الي شفتوها بيه.
(سلمى)
_ لأ مش ممكن ارجع هناك تاني ابدا لأ.
(يصاب سيد ممدوح بصدمة غير قادر على الكلام يدوخ قليلا وقبل ان يسقط يمسكه محمد فرج قائلا)
_ سيد .. يا جماعة ساعدوني.

الحلقة رقم 13 من مسلسل اللعبة 3 F042235469

(يتجمع الكل حول سيد)
(مصطفى)
_ نزله على الارض يا محمد .. ابعدو عنه شوية عشان يتنفس .. سيد انت سامعني؟
(سيد ممدوح)
_ مصطفى .. شروق ماتت؟
(مصطفى)
_ ما نعرفش جايز يكونو شافو اي حاجة متعلقة بالشجرة .. الدنيا ليل والمكان مظلم ممكن تكون اي حاجة.
(سيد لا يستطيع التماسك فيسقط ارضا بالرغم من محاولة امساك محمد به ولكنه يسقط)
(محمد فرج)
_ يا جماعة ساعدوني.
(مصطفى)
_ لازم نحمله ونرجعه البيت.
(سلمى)
_ وشروق؟؟؟ ... هنسيبها متعلقة؟
(مصطفى بغضب محاولا رفع سيد)
_ مين قال انها متعلقة؟ الدنيا ليل جايز شفتو اي حاجة.
(سالي)
_ لأ .. حتكون ايه غيرها؟ .. هي شروق .. احنا شفناها متعلقة بالشجرة.
(عين الحياة)
_ مش جايز تكون حاجة تانية؟ .. يعني جايز تكون فخ من روميو تكون دمية ولا حاجة؟
(سيليا)
_ او حيوان متعلق .. انتو متأكدين؟
(سلمى)
_ يعني ايه حيوان؟ احنا قادرين نميز الحيوان من الانسان .. هي شروق متعلقة بالشجرة وميته.
(سيد ممدوح يستيقظ قائلا بصعوبة)
_ قتلها؟ قتلها بردو؟؟
(مصطفى)
_ سيد ارجوك تماسك .. ماحدش محملك المسؤوليه .. وبعدين احنا لازم نروح نشوف ونتأكد الاول ... احنا هنرجعك البيت الاول.
(سيد ممدوح)
_ لأ ... لأ انا كويس .. هقوم اهو ... لازم اعرف اجي معاكم واعرف.
(حماده)
_ نروح ازاي؟ جايز يكون ده فخ لينا .. اكيد علقها عشان يجرنا لهناك .. احنا لازم نمشي من هنا .. خلاص شروق وماتت نفضل هنا ليه؟؟
(محمد كرويم)
_ لازم نروح نتأكد الاول .. الي عايز يجي يجي والباقي يرجعو البيت مع سيد عشان هو تعبان.
(سيد ممدوح)
_ لأ انا كويس .. انا هاجي معاكم جايز اطمن وتطلع مش هي.
(سالي)
_ انا مش هقرب لهناك تاني .. انا بس هقلكم الاتجاه الي تمشوه فيه.
(مصطفى)
_ ماشي دلينا وارجعو انتو مع محمد فرج وسيد.
(سيد ممدوح)
_ انا هاجي معاكم يا مصطفى ارجوك .. لازم اطمن.

الحلقة رقم 13 من مسلسل اللعبة 3 8b7ea0da54

(تعود البنات للبيت مع محمد فرج واما الباقي فيمشون بالاتجاه الذي اشارت لهم به سالي بحثا عن شروق وفي اثناء مسيرهم)
(حماده)
_ هناك .. وقفو خلاص .. هناك شافين الشجرة الي هناك؟
(يتجمع الكل ليرو الشجرة وهم على بعد منها)
(سيد ممدوح)
_ في حد متعلق فعلا ... يبئى قتلها.
(مصطفى)
_ لازم نقرب عشان نعرف.
(محمد كرويم)
_ لحظة هتروح فين؟ .. ده اكيد فخ.
(مصطفى)
_ لازم نتأكد.
(حماده)
_ عايز تتأكد من ايه ما هي قدامك هناك وميته كمان.
(مصطفى)
_ المكان ظلمة اوي .. مش جايز تكون دي دمية ولا حاجة تانية عملها روميو عشان يوهمنا انه قتل شروق؟
(محمد كرويم)
_ وانت هتعرف ازاي؟ .. لو قربت هيكون ده فخ.
(مصطفى)
_ هقرب شوية بس.
(شيكا)
_ الحقير ده اكيد ناصب فخ هنا .. قتل البنت المسكينة بس عشان يجرنا لهنا.
(مصطفى)
_ انا هقرب .. شوية بس ... شوية عشان اعرف.
(علي)
_ وانا هاجي معاك .. لو كانت شروق هقرب واعرف.
(محمد كرويم)
_ ده جنان .. قربو واتأكدو بنفسكم واحنا مستنين هنا.
(سيد ممدوح)
_ ارجوكم خدو بالكم .. وطمنونا.

الحلقة رقم 13 من مسلسل اللعبة 3 D0a2e7dea5

(في مكان اخر يعود الجميع للمنزل منتظرين الخبر عن شروق)
(سيليا)
_ هم اتأخرو ولا انا حاسة كده؟
(سالي)
_ لا انتي الي حاسة كده لسى بدري .. المكان بعيد شوي.
(سلمى)
_ انا مش فاهمة احنا بنستنى ايه هنا؟ .. لازم نمشي من المكان ده ونهرب قبل ما يموت حد تاني فينا.
(في هذه اللحظة يرمي احدهم حجر على شباك المنزل فيرتعب الجميع)
(عين الحياة)
_ مين ده؟؟
(سلمى)
_ ده اكيد هو ... جايز يقتل حد فينا.
(محمد فرج)
_ انا هطلع اشوف مين.
(عين الحياة)
_ لأ يا محمد انت هتروح فين؟ .. ده اكيد فخ من روميو عشان يطلع حد فينا.
(سلمى)
_ لازم نمشي من هنا يا جماعة.
(محمد فرج)
_ نمشي نروح فين؟ احنا هنستنى الباقي لما يرجعو .. اساسا احنا بئينا الفجر .. دلوقتي يرجعو ونشوف هنروح فين.
(عين الحياة)
_ خلاص الصوت راح ... باين انه مشي.
(محمد فرج)
_ معقولة يكون روميو؟ .. معقوله حقده علينا يخليه يقتل اتنين مننا بالشكل ده؟
(في هذه اللحظة يصل الباقي للمنزل ويدخلون فيقف محمد فرج والبنات باهتمام ليعرفو ماذا حصل)
(محمد فرج بقلق كبير)
_ طمنونا يا جماعة حصل ايه؟
(عين الحياة)
_ ايه .. هي شروق؟ شروق المتعلقة؟
(يدخل الجميع للمنزل يجلسون من التعب والارهاق الشديد في حين يرد شيكا)
_ لأ مش شروق.
(سالي باستغراب)
_ مش شروق؟؟ ... ازاي احنا شفناها متعلقة هناك؟
(سلمى)
_ احنا متأكدين انها كانت متعلقة.
(محمد كرويم)
_ اطمنو مش شروق.
(عين الحياة بلهفة وحماس)
_ الحمدلله .. الحمدلله ياربي .. يبئى شروق لسى عايشة اكيد.
(حماده بانزعاج)
_ الله اعلم .. المهم اننا ما نعرفش هي فين بردو ومش معقولة نفضل هنا عشان المجرم ده يموتنا واحد واحد.
(سيليا بحماس)
_ هندور على شروق لحد ما نلاقيها .. مش معقولة بعد ما عرفنا انها لسى عايشة نسيبها ونمشي من هنا.
(علي)
_ بلاش الحماس الزايد يا جماعة .. احنا لسى ما نعرفش هي فين ولا حصلها ايه.
(سيليا بسعادة)
_ مش مهم .. المهم انها لسى عايشة .. هندور عليها في كل حتة وفي كل زاوية لحد ما نلاقيها .. هنرجعها معانا وهنرجع مصر كلنا.
(عين الحياة)
_ معاكي حق يا سيليا .. لازم نكون متفائلين واقوى من روميو ده .. احنا الجماعة واحنا الاقوى وماحدش حيعرف يئذينا.
(سيليا)
_ كفاية ان شروق لسى عايشة وبتتنفس عشان نعرف اننا لازم نقاتل ونواجه ونغلب روميو ده ونقضي عليه.
(عين الحياة)
_ دي اكيد اشارة من ربنا ومعجزة ان شروق تكون عايشة ... ده دليل على اننا لازم نكون اقوى من اي حاجة.
(محمد فرج)
_ البنات معاهم حق .. بلاش نظرة التشائم دي على وجوهكم يا جماعة .. مالكم في ايه؟ .. احنا لسى موجودين مع بعض ونقدر نجيب شروق ونرجع بيها مصر تاني.
(سيد ممدوح يقول دون حماس)
_ جايز ... جايز نعرف نوصلها ونرجعها تاني.
(عين الحياة)
_ طبعا هنعرف نرجعها ... طالما الجبان ده ما قتلهاش يبئى هو بس بيلعب .. كنت متأكده انه مايقدرش يموت فارة .. هو بس كان عايز يخوفنا وخلاص.
(سيليا)
_ صحيح ... عمل كده عشان نخاف وبس.
(علي)
_ قلنا يا جماعة بلاش حماس زايد ...
(سيليا)
_ هو في ايه؟ مالكم كده؟ ... انتو مش متأكدين ان شروق ماكانتش متعلقة هناك زي ما سالي وسلمى افتكرو؟؟
(سالي)
_ انا مافتكرتش انا متأكده .. شفتها بعيني متعلقة هناك شفتها.
(سلمى)
_ وانا كمان شفتها ... صحيح الدنيا كانت مظلمة انما كانت متعلقة هناك على الشجرة انا مش بتخيل.
(شيكا)
_ اطمنو شروق مش متعلقة.
(مصطفى)
_ الي كان متعلق هناك هو .............. نـوســـــي

الحلقة رقم 13 من مسلسل اللعبة 3 7cb98aec91

الى اللقــــاء في الحلقـــــة القـــــادمة

عضو العمر : 37

لالالالالا بقي لا انا عايزة الحلقة ايه يانونتي انتي يوم الجمعه بتختصريها ليه
وقفت عن نقطة لالالا دي قصية جدا ال 14

عضو العمر : 28

تسلم ايديكي يا حنان حلقة جاااااااااااااااااااامدة اوي و بكده نوسي خرجت من دايرة الشك زي ماعين كانت بتقول طالما لقينا جثتها بس روميو انا مفروسة منه ع الأخر هو عايز مننا ايه الواد ده

مشرفة العمر : 38

ياااحبيبتى يا نووووووووسى اتقتلتى واتعلقتى كمان

ربنا يطمنا عليكى يا شرووووووووق

الإدارة العمر : 36

فعلاً هو لا يقدر يموت فارة ولا حتى نملة ده بيخاف من روحه ههههههههههههههههههههههههههههههههههه تسلم ايديكي يا حنان على الحلقة الجميلة ، معقولة تكون نوسي فعلاً الي متعلقة يا حنااااااااااااان انا كدة بقيت محتارة اكتر واكتر بس مممكن متبقاش نوسي الي متعلقة عموماً هاقرا ال14 واشوف وهارد عليكي

Admin العمر : 35

ميرسي يا جماعة قرب موعد الاجابة النهائي الكل يقرر مين المجرم بئى ههههه

ههههههههههههههههههههههههههههههههههههههههههههههههه والله انتوا بتضحكونى بجد بردودكم دا ههههههههههههههههههههههه كلكم عايزين تنتقموا منى مع انى انا اللى هوريكم النجوم فى عز الضهر ههههههههههههههههههههههههههه وربنا يانونتى حلقة مالهاش حل بجد تسلم ايدك ياحبيبتى

عضو العمر : 38

ايه ايه البهدله اللى انتوا مبهدلنهالى دى بس والله ماهسيبكم هتشوفوا

» الحلقة رقم 19 من مسلسل اللعبة 3
» الحلقة رقم 21 من مسلسل اللعبة 3
» الحلقة رقم 22 من مسلسل اللعبة 3
» الحلقة رقم 15 من مسلسل اللعبة 3
» الحلقة رقم 11 من مسلسل اللعبة 3